Aluşta şeer mahkemesi şeer şurası deputatı Pavel Stepançenkonı qanunsız halq ögünde merasimni teşkil etkeni ve politsiya hadimleriniñ talaplarına itaat etmegeni içün qabaatlı tanıdı, dep bildire «Tvoya gazeta».
Neşirniñ malümatına köre, mahkeme Stepançenkoğa qanunsız miting içün 30 saat içtimaiy işler ve politsiyağa itaat etmegeni içün 5 kün apiste bulunma cezasını belgiledi. Mahkeme zalından onı vaqtınca bulunma izolâtorına alıp ketirdiler.
Aluştada iyün 4-te politsiya şeer yalısında inşaatqa qarşı çıqqan yerli sakinlerniñ toplaşuvını dağıttı. Dağıtuv vaqtında rusiyeli politsiya hadimleri yerli deputat Pavel Stepançenkonı ve onı qoruğan eki kişini yaqaladı.
Stepançenkonı politsiya şeer bölüginde tahminen yedi saat tuttılar ve eki memuriy protokol tizdiler, bundan soñ o yiberildi. O, urma ve onıñ adına uquq qoruyıcılar tarafından qorquzmalar aqqında bildirdi. Diger eki yaqalanğan kişini – Leonid Litvinçuk ve Ruslan Marinkovnı rusiyeli politsiya hadimleri tek iyün 6-da yiberdi.
İyün 9-da Litvinçukke 25 saat içtimaiy işler ve 2 kün apiste bulunma cezası belgilendi.
Aluştada yüz bergen vaqialarğa izaat berip, Qırım politsiyasınıñ matbuat hızmeti yolbaşçısı Olga Kondraşova, «politsiya Aluştada qanunsız mitingni toqtattı», dep añlattı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
