Rusiye prezidenti Vladimir Putin iyün 16-da Sankt-Peterburgta keçirilecek iqtisadiy forumda Birleşken Milletler Teşkilâtı (BMT) baş kâtibi Pan Gi Mun ve BMT-nıñ Süriye boyunca elçisi Endrü de Mistura ile körüşmege planlaştıra.
Putinniñ yardımcısı Yuriy Uşakovnıñ iyün 14-te Moskvada bildirgenine köre, Putin Sankt-Peterburgta Frenkistan sabıq prezidenti Nikolâ Sarkozi ile iyün 15-te ğayrı resmiy körüşüv keçirmege niyetlene, dep bildire Radio Svoboda.
BMT yolbaşçılığı ile körüşüvde «global terrorizmge qarşı küreş ve Süriyedeki vaziyet» muzakere etilecek, dep qayd etti Uşakov.
BMT baş kâtibi Pan Gi Mun rusiyeli «TASS» agentligine bergen intervyusında bildirdi ki, Rusiyeniñ, Amerika Qoşma Ştatlarınen bir sırada, Süriyede barışıq vaziyetini qaytarmaq içün alıp barılğan faaliyette büyük rolü bar.
«Tek razılaşma, dialog ve halqara toplulıqnıñ, bu toplulıqnıñ esas azası olaraq, Rusiyenen beraberlikte etilgen ğayretleri ilerimege yol bere bile», – dep ayttı Pan Gi Mun.
Onıñ qayd etkenine köre, Süriyede barışıq vaziyetini qaytarması boyunca Cenevredeki muzakereler, BMT iştirak etken eñ mürekkep muzakereler sayıla.
