Ukraina prezidenti Petro Poroşenko iyün 14-te, salı künü Rusiyeden qaytqan ukrain siyasiy mabusları Gennadiy Afanasyev ve Yuriy Soloşenko ile körüşecek. Bu aqta Ukraina prezidentiniñ matbuat hızmeti bildire.
Elde tilgen malümatqa köre, körüşüv tahminen saat 17:00-de Devlet işler idaresiniñ «İlmiy-ameliy profilaktika ve klinik tıbbiyeti merkezi» Devlet ilmiy müessisesinde keçirilecek.
Ukraina prezidenti Petro Poroşenko iyün 14-te ukrainlerniñ Moskvadan evge çıqqanları aqqında bildirgen edi.
İyün 14-te, saba Rusiyede mahküm etilgen Qırım sakini Gennadiy Afanasyevniñ anası Qırım.Aqiqatqa Kiyevge kelgenini ve oğlunıñ Ukrainağa qaytacağını beklegenini ayttı.
Bundan evel, Odessada mayıs 2-de yüz bergen vaqialar boyunca şeklenilgen eki Rusiye vatandaşınıñ Rusiyede mahküm etilgen eki Ukraina vatandaşı Yuriy Soloşenko ve Gennadiy Afanasyevge ola bilecek deñiştirüv aqqında malümat peyda olğan edi. Bu aqta, hususan, Ukraina baş prokurorı Yuriy Lutsenko ve Ukraina havfsızlıq hızmetiniñ yolbaşçısı Vasiliy Gritsak bildirgen ediler.
Ukraina adliye naziri Pavel Petrenkonıñ bildirgenine köre, ukrain tarafı Rusiyege Soloşenko ve Afanasyevniñ vatanğa qaytarılması içün vesiqalarnı teslim etti.
Rusiyede 26 yaşındaki Gennadiy Afanasyev Qırım territoriyasında terroristik birligini teşkil etkeninde qabaatlanğan ve 2015 senesi 7 yılğa apiske qaldırılğan, 74 yaşındaki Yuriy Soloşenko ise, casuslıqta qabaatlanıp 6 yılğa apiske qapatılğan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
