Link açıqlığı

Ukraina Milliy hatıra institutınıñ hadimi Maksim Mayorovnıñ fikrince, Aqyarnıñ 2014 senesi «Qırım baari» vaqialarında büyük rolu bar edi, çünki şeerde Rusiye Federatsiyası Qara deñiz Flotu yerleşken edi.

Böyle fikirni o, Qırım.Aqiqat Radiosınıñ saba yayınında bildirdi.

«Bu vaqialar hususan bu şeerden başlandı. Bu, belki, Aqyarnıñ bar olğan ayrı bir dünya baqışınen degil de, amma bu şeerde qanuniy şekilde Rusiye Federatsiyasınıñ silâlı quvetleri, yani Rusiye Federatsiyası Qara deñiz Flotu bulunğanınen bağlıdır. Sözniñ doğrusı, Aqyar, Qırım yarımadası işğaliniñ başlanğıç noqtası, ve kelecekte Ukraina şarqında cenkke yol bergen başlanuv edi», – dedi o.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

Qırım işğal etilgen soñ, Ukraina şarqında şimdiki vaqıtta alâ daa devam etken silâlı dava başlandı. Ukraina ükümeti o yerde Rusiye tarafından desteklengen silâlı taqımlarğa qarşı antiterroristik ameliyatnıñ keçirilmesini ilân etti. Rusiye ükümeti, Ukraina ve Ğarp bildirgen rusiyeli askerlerniñ davada iştirak etkenleri aqqında malümatını bir qaç kere red etken edi. Moskva, Donbassta tek rusiyeli «göñülliler» bulunğanını tanıy.

XS
SM
MD
LG