Qırımtatar rejissöri Nariman Aliyevniñ «Sensiz» filmi Palm-Springste (Amerika Qoşma Ştatları) 22-ci halqara qısqa film festivaliniñ konkurs programmasına saylandı. Bu aqta LB.ua agentligine «Suçasne ukrayinske kino» («Zemaneviy ukrain kinosı») cemaat teşkilâtında bildirdiler.
Filmlerniñ seyir etilmesi iyün 21-27 künleri Kaliforniya ştatında keçirilecek.
Palm-Springste keçirilgen ShortFest festivali Şimaliy Amerikada qısqa filmlerniñ eñ büyük seyir etilüvi sayıla. Bu sene o yerde 54 memleketniñ 327 filmi taqdim etilecek.
«Suçasne ukrayinske kino» cemaat teşkilâtında qayd etkenlerine köre, kino festivaliniñ dört kategoriyası boyunca, bu cümleden cedveline ukrain şeriti kirgen «Eñ yahşı bediiy film» kategoriyası boyunca ğalipler, avtomatik olaraq, Kinematograf sanatları akademiyası (AMPAS) tarafından Oskar mukâfatına taqdim etilmesi içün baqıla.
Kino festivaliniñ ğalipleri iyün 26, bazar künü ilân etilecek.
Palm-Springsteki kino festivalinde Şimaliy Amerikada qısqa filmler içün yekâne kino bazarı keçirile. Kino seyir etilmesi programmasına saylanğan filmler, avtomatik olaraq, filmler kitaphanesine tüşe, bu kitaphane festival saylayıcıları ve distribyutorlar içün açıq.
Nariman Aliyevniñ «Sensiz» filmi bu sene Berlin kino festivaliniñ Generation programmasında iştirak etken edi. Umumen olaraq, Aliyevniñ üç qısqa filmi bar.
