Link açıqlığı

Saatnıñ esas haberi

Tahminen on beş insan Qırım işğal etilgen soñ ğayıp oldı – Celâl


Nariman Celâl
Nariman Celâl

Qırımtatar Milliy Meclisi reisiniñ birinci muavini Nariman Celâlnıñ qayd etkenine köre, Qırım Rusiye tarafından işğal etilgen soñ yarımadada tahminen on beş insan ğayıp oldı.

Bu aqta o, Radio Svobodağa bergen intervyusında bildirdi.

«Farqlı raqamlar bildirile. Kiyevde tahminen yigirmi kişi aqqında aytalar, biz, ğayıp olğanlarnıñ sayısı biraz azca olğanını tüşünemiz. Ğayıp olğanlarnıñ bazıları ölü tapıldı – Reşat Ametov ve Edem Asanov. Soñki kişi asılıp özüni öldürgen, dep aytalar, amma bizden çoqusı uquq qoruyıcılarnıñ obyektiv olğanından şübelene. Qalğan ğayıp olğan adamlar, bizim sayğanımızğa köre, tahminen on beş insandır. Olarnıñ bazıları eki yıl evel ğayıp oldı, amma şimdiki vaqıtqa qadar ne bizim, ne de olarnıñ soy-soplarınıñ olar aqqında iç haberleri yoq», – dedi Celâl.

Tintüvler, hırsızlıq ve diger qırımtatarlarğa nisbeten yapılğan basqınlar Qırım işğal etilgen soñ bitmey. Bu aqta daimiy şekilde uquq qoruyıcılar, bu cümleden halqara uquq qoruyıcılar bildire. Lâkin, Kreml ve Rusiyege boysunğan Qırım ükümeti bunı red ete, ve er vaqıt «cinayetniñ milleti yoqtır» dep ilân ete.

Ukraina ükümeti ve halqara toplulıq daimiy şekilde Rusiyeni Qırımda repressiyalarnı toqtatmağa çağıralar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG