Donetsk vilâyeti devlet memuriyetinde iyül 5-te Kramatorskka«Eurovision-2016» yarışında ğalebe qazanğan Ukraina temsilcisi, Qırım yırcısı Jamala kontsert programmasınen kelecegi aqqında bildireler.
«Kramatorsknıñ silâlı taqımlardan azat etilmesiniñ eki yıllığına şeerni populâr ukrain yırcısı Jamala ziyaret etecek», – dep aytıla memuriyet matbuat hızmetiniñ beyanatında.
Elde etilgen malümatqa köre, Jamala Kramatorsknıñ merkeziy meydanında sanağa çıqacaq. Kiriş serbest.
Yırcınıñ resmiy saytında bu malümat daa tasdıqlanmadı.
Ukraina temsilcisi, Qırım yırcısı Jamala «Eurovision-2016» yarışında ğalebe qazandı, onıñ finalı İsveçiya paytahtı Stokgolm şeerinde mayıs 15-ke keçer gecesi keçirildi. Konkurs qaidelerine binaen, endi kelecek sene Ukraina «Eurovision» yarışını öz devletinde qabul ete bile, amma onıñ bunı red etmege de aqqı bar.
