Faaller Qırımtatar bayrağı kününe bağışlanğan Qırım toponimikası boyunca fleşmobnı başlay ve er kesni qoşulmağa davet ete.
«Fleşmob çerçivesinde adamlar, yaşağan meskün yerinde onıñ tarihiy adı yazılğan işaret yanında fotoresim yapıp, ananeviy Qırım toponimikasını populârlaştıracaq», – dep añlata faaller.
Aktsiya daa kütleviy şekilde keçsin ve daa çoq insanlarnı celp etsin dep, er iştirakçige içtimaiy ağlar vastasınen üç tanış kişini davet etmege teklif etile.
Aktsiya şartları boyunca tafsilâtlı malümatlarnen bu yerde tanış olmaq mümkün.
İyün 26-da qayd etilgen Qırımtatar bayrağı kününe bağışlanğan bir sıra fleşmob, yarış ve diger merasimler teşkil etilecek, dep qayd ete faaller.
Kiyevde Qırımtatar bayrağı kününe bağışlanğan merasimlerni keçirmege azırlanalar. Programma çerçivesinde resim yarışı, avto yürüş ve vatanperverlik mitingi teşkil etilecek.
Qırımtatar bayrağı künü bir qaç yıl evel Qırımda qayd etilip başladı. Bayram künü, 1991 senesi iyün 26-27 künleri Aqmescitte keçirilgen ekinci Qırımtatar Qurultayınıñ ilk künü olğan kün belgilendi.
Qırımtatar bayrağı, üstünde altın tamğa olğan kök tüsteki ketenden ibarettir.
