Rusiyeniñ baş müftisi Ravil Gaynutdin Sergey Aksenovnı acılıqnı teşkil etkeni içün medalnen taqdirledi. Asılında ise – musulmanlar içün dayanılmaz şaraitler yaratqanından mukâfat qazandı.
Rusiye müftileri Şurasınıñ saytında onıñ reisi Ravil Gaynutdin aqqında malümat Kazan imamı Suleyman Zaripov ve Qoşma Arap Emirliklerinden kelgen musafiri şeyh Nacmutdin qıdırılğanına dair ilân yanında yerleştirilgen. Olar fevral ayında Rusiyede maşinanen seyaat etip ğayıp oldılar. Maşinaları tapıldı, amma ğayıp olğan musulmanlar aqqında malümat alâ daa yoq. Kün-künden olarnıñ sağ olmasına olğan ümüt irip kete. Rusiyeniñ baş müftisi Gaynutdin ğayıp olğanlarnıñ yeri aytılsa, 100 biñ ruble bermege vade etip, Rusiye Taqiqat komitetiniñ yolbaşçısından taqiqatnı kontrol altına almağa rica etti.
Rusiyede musulmanlar qaçırıla ve mahkemesiz idam etile. Bu daa çoq Şimaliy Kavkazda ola. Rusiye mahsus hızmetleri Qırımğa kirgen soñ anda da qırımtatarlar ğayıp olmağa başladı – Gaynutdinniñ dindaşları. Amma ne o, ne de Qırım ve Aqyar musulmanları Diniy idaresiniñ yolbaşçısı acı Emirali Ablayev Qırımda ğayıp olğanlarnı qıdırmağa rica etmeyler, bir malümat içün para bermeyler. Adamlarnı qaçırğanlarğa ve akimiyette olarğa qoltutqanlarğa qarşı bir söz açıq sürette aytılmay. Bes-belli ki, onlarnen taqiq etilmegen qaçırma Qırımnıñ şimdiki akimiyetiniñ haberi olmasa edi, yapılmaz edi. 2014 senesi mart ayından soñ yarımadanıñ biñlernen musulmanı birden «ekstremist» oldı.
İslâm – Moskva içün büyük bir problem. Memurlar olur-olmaz yerge «islâmcı» sözüni qoşalar
Bu vaqia Aqmescitteki «Rusiye musulmanlarınıñ acılığı: keçmişi ve bugüni. İslâm terrorizmge qarşı» konferentsiyasında olıp keçti. Müftiler acılıqnıñ teşkil etilmesine qıymet kestiler, Kreml olarnı Rusiye musulmanlarınıñ yaşayışlarını kontrol etecek devlet memurlarını kibi tayin etti.
Keçken sene Qırım musulmanlarınıñ acılığı Rusiyeniñ diger regionları ve Ukrainada olğan Mekke acılığı fiyatlarına köre ucuz oldı. Bunı yerli ya da merkeziy bücetten kösterilgen yardım vastasınen yapmaq mümkün. Medalni köz ögüne alsaq, Aksenov da Qırım musulmanlarını bu şekilde satıp aldı.
Kreml tayin etken Qırım yolbaşçısınıñ mukâfatlandıruvı 2015 senesi Gaynutdinge berilgen «Vazife sadıqlığı içün» nişanına cevap oldı. Onı Qırımda işğalden soñ tesis etken ediler.
Rusiye devlet sistemasında bir qıymeti olmağan «mukâfatlarnen» taqdirlev – Qırım musulmanları tuvğan topraqlarında faciağa oğrağan vaqıtta memurlarnıñ yapqan oyunlarıdır
Rusiye devlet sistemasında bir qıymeti olmağan «mukâfatlarnen» taqdirlev – Qırım musulmanları tuvğan topraqlarında faciağa oğrağan vaqıtta memurlarnıñ yapqan oyunlarıdır. Sovetlerniñ siyasiy reberi Aksenov ve Rusiye prezidenti devlet hızmeti akademiyasınıñ mezunı Gaynutdin eki yüzlülik mevzusında raqip ola: olar bir şeyni yahşı añlaylar, konferentsiyada biri-birini maqtağan vaqıtta Qırım, Dagestan, Çeçenistan ve İnguşetiyada arbiy urbalı insanlar musulmanlarnı qıynay ve öldüreler.
Gaynutdin biledir, Cenab-ı Haq Quran-ı Kerimde dey ki, eki yüzlü olğan insanlar ceennemge tüşecek. Rusiyeniñ din memurları içün habaşilerniñ vekilleri yolbaşçılıq etken Ukraina musulmanları Diniy idaresinde olğan zenaatdaşlarınıñ ikâyesi ibret ola bile. Bu tariqatnıñ liderleri diger musulmanlardan nefret etip, olarnı ara-sıra «ekstremist» dep adlay. Yaqında Donetskte yerli terroristler habaşilerden olğan bir qaç musulmannı tutıp, olarnı… ekstremizm ile qabaatladılar.
Anvar Derkaç, jurnalist
«Bloglar» rubrikasında bildirilgen fikir-tüşünceler yalıñız müelliflerine ait olıp, muarririyetniñ baqışlarını aks ettirmeydir