İyün 11-de, cumaertesi künü Sevastopolskaya soqağındaki Kremlge boysunğan Qırım prokuraturası yanında VAZ 2108 avtomobili yanmağa başladı.
Qırım.Aqiqat mühbiriniñ bildirgenine köre, maşna aydavcısı söndürici vastasınen büyük ateşniñ peyda olmasını toqtattı.
Vaqia yüz bergen yerni keçken aydavcılar belâğa oğrağan aydavcı ve onıñ yolcularını felâkette qaldırmadı. Olarnıñ çoqusı toqtap, avtomobilde ateşni söndürmege ve VAZ kapotını açmağa tırıştı.
Şaatlarnıñ sözlerine köre, vaqia yüz bergen yerde yanğıncılar yoq edi.
Avtomobil yanmağa başlağanı sebebinden yolnıñ bu qısmında yol areketi ağırlaştı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
