Qırımda Keriç boğazında köpür qurulacaq territoriyasında yaşağan Keriç sakinleriniñ yerleştirilmesi içün 20 million ayırmağa söz bereler. Qırım bücetine mütenasip deñişmelerniñ Kremlge boysunğan Qırım parlamentiniñ nevbetten tış umumiy toplaşuvında kirsetilmesi planlaştırıla, dep bildire Keriç şeer memuriyetiniñ matbuat hızmeti.
Evleri köpür qurulması territosiyasında bulunğan Keriçteki Tsementnaya slobodka sakinleriniñ yerleştirilmesine para ayırılması aqqında Qırım parlamenti reisiniñ birinci muavini Konstantin Baharev bildirdi.
Onıñ sözlerine köre, Tsementnaya slobodka sakinleriniñ yerleştirilmesiniñ teşkil etilmesi içün umumiy masraflar 246 million rubleni, bu cümleden, Rusiye bücetinden 226 millionve Qırım bücetinden 20 million rubleni teşkil etecektir.
«Endi kelecek afta köçecekler içün Nijniy Solneçnıy maallesinde çoq daireli evler quruvınıñ başlatması planlaştırıla, bunıñ içün, yapıcınıñ (podrâdçik) vaqtında işini başlap olması içün, nevbetten tış umumiy toplaşuvnıñ keçirilmesi kerek oldı», – dep qayd etti Baharev.
Onıñ sözlerine köre, işlerniñ bitirilmesi ve yañı evlerniñ işke tüşürilmesi bu sene noyabr ayına planlaştırılğan.
Umumen olaraq, Tsementnaya slobodkada 8 ev sakinleriniñ yerleştirilmesi planlaştırıla, o yerde 185 insan yaşay. Köçecekler içün yañı evler 2016 senesi oktâbr ayınıñ soñuna qadar qurulmaq kerek, dep söz bereler memuriyette.
Keriç sakinlerine olarnıñ kelecekte ola bilecek evleriniñ leyhasını kösterdiler, ve bu evler «komfort» olacağını vade ettiler. Tsementnaya slobodka maalesinde yaşağan Keriç sakinleri bundan evel Keriç köprü quruvı içün köçmege, amma tek «keyfiyetli ve musaviy qıymetli dairelerge», razı olğanlarını bildirdi. Yerli akimiyet ile añlaşmasalar, Moskvağa şikayet etmege niyetlengenler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
