İşğal etilgen Qırımda «Krımhleb» işhanesi kâtibiniñ ölüvi aqqında malümat peyda oldı. İyün 10-da, cuma künü «Krımskiy telegraf» gazetasınıñ yañı 382 (21) sanlı sanında bildirildi ki, Qırım işhanesiniñ baş kâtibi pencereden atıldı.
Neşirniñ malümatına köre, 2015 senesi mayıs ayında Kremlge boysunğan Qırım maliye nezareti hızmeti Qırım Cumhuriyeti «Krımhleb» devlet unitar işhanesinde teşkerüv keçirip, işhaneniñ idare başlıqları tarafından yapılğan 20 million rubleni teşkil etken bozuvlarnı belgiledi. Bildirilgen malümatqa köre, esas zarar, kötere alıcılarğa mahsulat kiçik fiyatınen satılğanınen bağlı.
«Adiy vatandaşlar-alıcılar endirim pek te körmegenlerini, ve soñki vaqıtları taze ötmek olaraq satılğan ötmek bayat olğanına şikâyet etkenlerini köz ögüne alsaq, sual peyda ola: ya para qayda? Aytalar ki, hususan maliye mahinatsiyaları sebebinden işhaneniñ baş kâtibi yoq oldı. O, öz-özüni öldürdimi, ya da oña bunı yapmağa yardım ettilermi – bu, elbet, uquq qoruyıcılar ögrenmek kerek olacaq. Amma onıñ ölüvini o qadar saqlaylar ki, bu malümat iç kütleviy haber vastalarında yoq», – dep yaza Qırımdaki gazeta.
Neşirniñ malümatına binaen, bu künleri «Krımhleb» işhanesiniñ müdiri deñiştirildi.
«Krımhleb» işhanesinde bu malümatqa izaat bermeyler. Qırım Taqiqat komitetiniñ saytında qadınnıñ ölüvi boyunca taqiqat aqqında malümat yoq. Qırım haber saytları, yarımadanıñ eñ büyük ötmek mahsulatı istisalcısınıñ kâtibi ölgeni aqqında malümat bildirmey.
«Krımhleb» 2014 senesi noyabr ayında Kremlge boysunğan Qırım parlamentiniñ qararınen «mahsulat havfsızlığını teminlemek maqsadınen» «devletleştirilgen» edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
