İyün 10-da, cuma künü Ukrainanıñ qırımtatar yırcısı Jamalanıñ dünyada eñ büyük sayılğan Universal Music Group leyblinde çıqarılğan «1944» albomı dünya yüzüni körecek.
Bu aqta Qırım.Aqiqatqa yırcınıñ matbuat hızmetinde bildirdiler.
«Reliz 12 yırdan ibaret, olarnıñ sekizi ingliz tilinde ve üçü ukrain tilinde, bu cümleden, Jamala «Eurovision-2016» halqara yır yarışında icra etip ğalebe qazanğan esas «1944» yırı olacaq», – dep aytıla beyanatta.
Matbuat hızmetiniñ bildirgenine köre, reliz Avropa territoriyasında Universal Music Denmark leybli tarafından çıqarıla. Elde etilgen malümatqa köre, yaqın vaqıtta albom Amerika Qoşma Ştatlarında da çıqarılacaq.
«Bu albomğa kirgen türküler şimdiki vaqıtta olğan fikirlerim ve duyğularımnı akis ete. Olarnıñ episi evge yol, yalıñızlıq, sevgi, yahşı kelecekke ümüt aqqında añlata. Bellesem, Avropa diñleyicileri begenir», – dep añlattı Jamala.
Ukraina temsilcisi olğan qırımtatar yırcısı Jamala «Eurovision-2016» halqara yır yarışında ğalebe qazandı, onıñ finalı İsveçiya paytahtında mayıs 15-ke keçer gecesi keçirildi.
Ukraina prezidenti Petro Poroşenko yırcığa «halq artistı» unvanını, Kiyev şeer yolbaşçısı Vitaliy Kliçko ise, oña «şerefli Kiyev sakini» unvanını berdiler.
