Link açıqlığı

Ukraina havfsızlıq hızmeti: Ukraina Afanasyev ve Soloşenkonı mayıs 2-de Odessada yüz bergen vaqıalarnen bağlı olğan kişilerge deñiştirmege azır


Vasiliy Gritsak

Ukraina havfsızlıq hızmeti 2014 senesi mayıs 2-de Odessada yüz bergen vaqıalarnen bağlı olğan vatandaşlarnı Rusiyede yaqalanğan Qırım faali Gennadiy Afanasyev ve «Znamâ» işhanesiniñ sabıq müdiri Yuriy Soloşenkoğa deñiştirmeni azırlay. Bu malümatnı iyün 10-da Kiyevde Ukraina havfsızlıq hızmetiniñ reisi Vasiliy Gritsak tasdıqladı, dep bildire Azatlıq Radiosı.

«Men bunı tasdıqlamağa isteyim – bu deñiştirmeniñ azırlanması boyunca iş alıp baramız», – dedi o. Tafsilâtlı malümatnı Gritsak bermedi.

Bundan evel böyle deñiştirme aqqında «Ukrainskiy vıbor» («Ukrain saylavı») areketiniñ lideri Viktor Medvedçuk bildirgen edi, o, Rusiye prezidenti Vladimir Putinniñ qudası ola.

İyün 1-de Ukraina havfsızlıq hızmeti reisiniñ mesleatçısı Yuriy Tanditniñ Azatlıq Radiosına bildirgen malümatına köre, Rusiyede apiste bulunğan 31 Ukraina vatandaşından ğayrı, Donbassta Moskva tarafından desteklengen separatistler daa 100-den ziyade ukrainni tuta, 665 kişi belgisiz ğayıp olğan sayıla.

Rusiyede 26 yaşındaki Gennadiy Afanasyev Qırım territoriyasında terroristik birligini teşkil etkeninde qabaatlandı ve 2015 senesi 7 yılğa apiske qaldırıldı, 74 yaşındaki Yuriy Soloşenko ise, casuslıqta qabaatlanıp 6 yılğa apiske qapatıldı.

XS
SM
MD
LG