Qırım vaqtınca işğal etilgeni sebebinden Ukraina 800-den ziyade bala tedaviylev ve raatlıq müessisesini coydı, dep bildireler Ukraina İçtimaiy siyaset nazirliginde.
Ukraina nazirliginiñ malümatına köre, umumiy sayıdan Qırımdaki bala müessiseleriniñ, tedaviylev müessiseleriniñ 122 danesi, bu cümleden er sene 30 biñden ziyade bala tedaviylengen «Artek» Halqara bala merkezi, raatlıq müessieleriniñ 680 danesi.
Umumen olaraq, İçtimaiy siyaset nazirliginiñ malümatına binaen, Qırımdaki bala müessiselerinde er sene 148 biñden ziyade bala tedaviylene ve raatlana edi.
Nazirlikte qayd etilgenine köre, bu sene Kiyevde Puşa-Ozernaya şifahanesi bazasında Ukraina prezidenti meseleleriniñ Devlet idaresiniñ «Artek» Halqara bala merkezi çalışmağa başlay. Lagerde tedaviylev kampaniyası 2016 senesi iyün 22-den başlanacaq.
2016 senesi aprel ayında Kiyev Obolon mahkemesi Rusiye tarafından işğal etilgen Qırımda yerleşken «Artek» lageriniñ mülkiyetini yaqaladı.
Mahkeme qararına apis etilgen «Artek» Qırım kompleksi obyektleriniñ tafsilâtlı cedveli, bu cümleden havuzlar, kommunikatsiya ve elektrik ağları, Aqmescitteki baza-musafirhane ve Oreandadaki «Glitsiniya» pansionatı kire.
2015 senesi sentâbr ayında Qırım Muhtar Cumhuriyeti prokuraturası rusiyeli Qırım yolbaşçısı Sergey Aksönovğa «Artek» Halqara bala merkezi» adlı Ukraina devlet müessisesiniñ mülkiyetini qanunsız şekilde öz mülkiyetine alğanı sebebinden cinayet yapqanında şeklenilgenini bildirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
