Ukrain diasporası iyün 10-da, cuma künü bütün dünya boyunca «Stop Putin! Stop cenk!» aktsiyasını keçirmek teşebbüsini bildirdi. Merasim Kiyev vaqtınen saat 18:00-de başlanacaq.
«Kiyevde aktsiya Mustaqillik Meydanında(Maydan Nezalejnosti) stela yanında, saat 18:00-den başlap keçirilecek. Aktisya iştirakçileri ğarbiy siyasetçilerge Rusiyeni Ukrainadan askerlerini ve arbiy tehnikasını tolusınen çıqarmağa mecbur etmek, OSCE nezaret missiyasını qaviyleştirmek ve onıñ işini künde 24 saatqa qadar uzattırmaq, OSCE missiyasını Ukraina vaqtınca nezaret astında tutmağan rusiyeli-ukrain sıñırınıñ qısmına yibermek, Rusiye Minsk añlaşmasını ömürge keçirmegeni sebebinden Rusiyege qarşı sanktisyalarnı devam ettirmek talabınen muracaat etecek», – dep bildire teşkilâtçılar.
Kiyevde aktsiya «İnsanlarnıñ Küçü» siyasiy firqasınıñ temsilcileri, «Ukrain legionı» cemaat teşkilâtı tarafından teşkil etile.
Donbassta arbiy faaliyet 2014 senesi aprel ayından başlap alıp barıla. O vaqıt Ukraina ükümeti Donetsk ve Lugansk vilâyetleriniñ qısmında terrorizmge qarşı ameliyat keçirecegini ilân etti. Donbassnıñ bazı meskün yerlerini, hususan Donetsk ve Lugansknı, Rusiye tarafından desteklengen silâlı taqımlar işğal etti.
Birleşken Milletler Teşkilâtınıñ malümatına köre, dava neticesinde tahminen 10 biñ adam elâk oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
