«Odessa deñiz akademiyası» Milliy universitetiniñ Ukraina Arbiy deñiz quvetleri (ADQ) fakultetiniñ kursantları gruppası Poloniya Cumhuriyeti ADQ oquv gemisinde stajlamadan keçmege başladı. Bu aqta Ukraina Silâlı quvetler ADQ komandanlığınıñ matbuat hızmeti bildire.
«Kelecekte flot zabitleri olacaq kursantlar zenaat boyunca ameliy alışqanlıqlar alması maqsadınen keçirilgen stajlama bu sene iyül soñuna qadar devam etecek. Planğa binaen, ukrain kursantları Avropanıñ diger devletlerinden zenaatdaşları ile, oquv gemisi ketken yoluna esaslanıp, Portugaliya Cumhuriyeti, İspaniya qırallığı, Montenegro ve İrlandiya limanlarını ziyaret etecekler», – dep aytıla beyanatta.
Stajlama arbiy tasil mükemmelleştirilmesi boyunca NATO programmasınıñ ömürge keçirilmesi çerçivesinde ve Ukraina Silâlı quvetlerniñ arbiy işbirligi merasimleri cedveline köre teşkil etile, dep bildireler Ukraina ADQ ştabında.
2016 senesi Odessadaki arbiy deñiz litseyiniñ 44 mezunından 38 kişi aliy oquv yurtlarına kirmege planlaştıra, bunen beraber, olarnıñ çoqusı Odessa milliy deñiz akademiyasınıñ arbiy deñiz fakultetine kirecek ola.
Qırım Rusiye tarafından işğal etilgen soñ Ukraina Arbiy deñiz quvetleri ştabı Odessada yerleşe. Gemiler birleşmesi Nikolayev, Oçakovda da buluna.
