Ukraina Nazirler kabineti Vaqtınca işğal etilgen territoriyalar ve memleket içinde köçip kelgenler meseleleri boyunca Nazirlik aqqında qararnı qabul etti
Ukraina Nazirler kabineti yün 8-de keçirilgen toplaşuvda Vaqtınca işğal etilgen territoriyalar ve memleket içinde köçip kelgenler meseleleri boyunca Nazirlik aqqında qararnı qabul etti. Bu aqta ükümet portalı bildire.
«Qararnıñ qabul etilmesi Nazirlikniñ uquqiy temeli olacaqtır, bu ise, silâlı dava ve Ukraina territoriyasınıñ qısmı vaqtınca işğal etilgeni sebebinden peyda olğan telükelerge vaqtında cevap bermege yardım etecektir», – dep aytıla beyanatta.
Ükümet toplaşuvında qabul etilgen qararda davalı maddeler qaldı, olar İçki işler nazirligi, İçtimaiy siyaset nazirligi ve Adliye nazirligi tarafından baqılacaq. Hususan, «İçtimaiy yardım aqqında» Ukraina qanunına uyğan bazı ifadeler aqqında söz yürsetile, dep qayd etti Ukraina Vaqtınca işğal etilgen territoriyalar ve memleket içinde köçip kelgenler meseleleri boyunca nazir Vadim Çernış.
Ukraina nazirler kabineti aprel 20-de keçirilgen toplaşuvda Vaqtınca işğal etilgen territoriyalar ve memleket içinde köçip kelgenlerniñ meseleleri boyunca Nazirlikni qurmağa qarar aldı. Vadim Çernış nazirlikniñ yolbaşçısı vazifesine tayinlendi. Bundan evel o, Donbassnıñ ğayrıdan tiklenilmesi meseleleri boyunca Devlet agentliginiñ yolbaşçısı edi. Ukraina Vaqtınca işğal etilgen territoriyalar ve memleket içinde köçip kelgenlerniñ meseleleri boyunca nazirniñ birinci muavini vazifesine qırımlı Yusuf Kurkçı tayinlendi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
