Rusiyege boysunğan Aqyar akimiyetinde 2014 senesinden başlap sürgün etilgen vatandaşlarğa reabilitatsiya aqqında 400-den ziyade malümat kâğıtınıñ berilgeni aqqında bildireler.
«Aqyar içki siyaset bölüginiñ milletler ve dinler meseleleri boyunca bölüginiñ malümatına köre, 2014 senesinden başlap reabilitatsiya aqqında malümat vesiqasını almaq içün vatandaşlarnıñ 1087 arizası keldi. Bularnıñ episi baqıldı. 406 spravka berildi, iş devam ete», – dep aytıla rusiyeli Aqyar akimiyetiniñ matbuat hızmetiniñ beyanatında.
Sene başında Kremlge boysunğan Qırım yolbaşçısı Sergey Aksönov kelecekte reabilitatsiya aqqında malümat kâğıtlarınıñ alınması qolaylaştırılması mümkün olğanını bildirdi.
Rusiye prezidenti Vladimir Putin 2014 senesi aprel ayında qırımtatar ve sovet vaqtında repressiyalardan zarar körgen Qırımnıñ diger halqlarınıñ reabilitatsiyası aqqında emirni imzaladı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
