Aqyar medeniyet müessiseleriniñ reberliginde kadr deñişmeleri ola.
Tavriya Hersonesi müzey qoruğı temsilcisiniñ Qırım.Aqiqatqa bildirgen malümatına köre, qoruq müdiri Larisa Sedikova öz vazifesinden boşatıla, amma ilim boyunca müdir muavini vazifesine qaytıp, müzeyde çalışmağa devam ete. O, bu vazifeni müessiseniñ müdiri vazifesine tayinlengeninden evel eda etken edi.
Şimdiki vaqıtta Hersones müdiri vazifesini kim eda etecegi daa belli degil.
«Şimdiki vaqıtta müdirniñ vazifesinden boşatılmasınıñ sebepleri ve aqibetleri aqqında çoq fikir ve tahminler bar, amma olarnıñ iç biri resmiy olaraq belgilenmedi», – dep ayttı Hersones temsilcisi.
Bundan da ğayrı, iyün 8-de Aqyarnıñ mudafaa ve azat etilmesi müzeyiniñ müdiri Aleksandr Rudometov öz isteginen vazifesinden boşatılmaq içün ariza yazdı.
Bu mesele boyunca müessise hadimleriniñ izaatı alınmadı. Aqyardaki «ForPost» haber portalınıñ malümatına köre, müdir vazifesine yaqında Volgograd şeerinden kelgen «Stalingrad uruşı» müzeyiniñ sabıq müdiri Nikolay Musiyenko tayinlendi.
Öz arizasına izaat berip, Rudometov onı bu vazifeden «boşatılmağa mecbur etekenlerini» bildirdi, ve şimdiki vaqıtta medeniy müessiseler müdirlerini «devletniñ qıtaiy tarafından kelgen adamlarğa» deñiştirgenlerini qayd etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
