Kremlge boysunğan Qırım ükümetinde 2016 senesi sentâbr ayınıñ soñuna qadar Aqmescit ve Aqmescit rayonında «narazılıq alanları» bütün iştirakçilerine topraq damartılarınıñ berilmesi planlaştırılğanını bildireler. Bu aqta iyün 7-de, salı künü Qırım baş nazir muavini Ruslan Balbek ilân etti, dep bildire Qırım ükümetiniñ matbuat hızmeti.
«Topraq damartısı ayırılması boyunca 5000 arizadan 2000-den ziyade baqıldı, eñ yaqın vaqıtta qalğanları da baqılacaq. «Yol haritasına» binaen, sentâbr ayınıñ soñuna qadar Aqmescitte ve Aqmescit rayonında yerleşken «narazılıq alanları» iştirakçilerine topraq damartıları berilmek kerek», – dep ayttı Ruslan Balbek.
Balbekniñ aytqanına köre, reabilitatsiyadan keçken Qırım halqlarınıñ içtimaiy şaraitnen teminlenmesi içün Federal programması çerçivesinde 10 milliard ruble ayırılması közde tutula.
«Soñki eki yıl devamında reabilitatsiyadan keçken halqlardan 170-ten ziyade qoranta – Aqmescit, Canköy şeerlerinde, Canköy, Yedi Quyu ve İslâm-Terek rayonlarında evlernen teminlendi», – dep ayttı Ruslan Balbek.
Bundan evel Rusiyege boysunğan Qırım ükümetiniñ Milletlerara munasebetler ve sürgün etilgen vatandaşlar meseleleri boyunca Devlet komiteti bildirgen edi ki, Qırımda «narazılıq alanlarında» öz isteginen inşaat başlağan vatandaşlar bu inşaatlar qanun boyunca tanılması içün 2016 senesi yanvar 1-ge qadar mütenasip arizanı bermek kerek edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
