Aqmescitte Moskvağa boysunğan rayon mahkemesi «Hizb ut-Tahrir» işi» boyunca qabaatlanğanlarnıñ biri olğan, İnsan aqları boyunca kontakt gruppasınıñ azası, Yalta sakini Emir-Usein Kukunıñ apiste bulunma müddetini üç ayğa uzattırdı. Mahkeme toplaşuvı iştirakçilerinden biri Qırım.Aqiqatqa bildirgen malümatqa köre, Qırım uquq qoruyıcısına apiste bulunma müddetini sentâbr 8-ge qadar uzattırdılar.
Mahkeme diñlemeleri pek keç başlandı, şimdi Aqmescit rayon mahkemesinde «Hizb ut-Tahrir» işi» boyunca diger qabaatlanğanlarnıñ – Yalta regionı sakini Enver Bekirov, Aluşta regionı sakini Muslim Aliyev ve Yalta sakini Vadim Siruknıñ apiste bulunma meselesi baqılacaq.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı.
«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
