Link açıqlığı

Türkiye prezidenti Recep Tayip Erdoğan Türkiye terrorizmge qarşı «soñuna qadar» küreşecegini ilân etti. Bu aqta o, iyün 7-de İstanbul merkezinde yüz bergen patlavdan soñ bildirdi. Vaqia neticesinde 11 insan elâk oldı, 36 kişi yaralandı.

Kütleviy haber vastalarınıñ malümatına binaen, bombalı avtomobil onıñ yanında politsiya hadimlerini taşığan avtobus keçken vaqıtta uzaqtan patlatıldı.

Bildirilgenine köre, patlav çoq adam olğan vaqıtta şeer merkezinde, İstanbul universiteti ve tarihiy kvartal yanında yüz berdi, o yerde çoq tarihiy obyektler yerleşe.

Patlav yüz bergen yerni köstergen fotoresimde zararlanğan avtobus ve binalarnı körmek mümkün.

Bundan da ğayrı, patlavdan soñ rayonda ateş açılması eşitilgeni bildirile. İç kimse bu vaqia boyunca mesüliyetni boynuna almadı.

Soñki vaqıtta Türkiyede ucumlarnı kürd silâlı taqımları, «İslâm devleti» taqımınıñ ekstremistleri ve «Kürdistan iş firqası» silâlı taqımları yapa.

Ukraina Tışqı işler nazirliginiñ konsul hızmeti bölügi, baş konsullıqnıñ ilk malümatlarına esaslanıp, patlav neticesinde zararalanğanlar arasında Ukraina vatandaşları yoq olğanını bildirdi.

XS
SM
MD
LG