Link açıqlığı

Mogerini Birleşken Milletler Teşkilâtınıñ Havfsızlıq Şurasında: Avropa Birligi Qırım ve Aqyarnıñ qanunsız işğalini tanımaz


Federika Mogerini

İyün 6-da Birleşken Milletler Teşkilâtınıñ Havfsızlıq Şurasınıñ toplaşuvında Avropa Birligi Tışqı meseleler vehavfsızlıq siyaseti boyunca yuqarı temsilcisi Federika Mogerini Qırım ve Aqyar işğalini hatırladı.

Bu aqta Birleşken Milletler Teşkilâtınıñ matbuat hızmeti bildire.

Onıñ qayd etkenine köre, ukrain davasınıñ toqtatılması Avropa birliginiñ esas maqsatlarından biri ola.

«Avropa birligi Ukrainanıñ topraq bütünligi tarafını tutmağa devam etecek ve Qırım ve Aqyarnıñ qanunsız işğalini tanımaz», – dedi Federika Mogerini.

Mayıs ayında Federika Mogerini Rusiyege qarşı sanktsiyalarnıñ onıñ Ukrainadaki alıp barğan faaliyeti içün iyül ayında devam ettirilmesini beklegenini ilân etti.

2014 senesi Avropa birligi, Moskva Qırımnı qanunsız işğal etkeni ve Ukraina şarqında Rusiye tarafını tutqan silâlı taqımlarğa destek köstergeni içün, Rusiyeniñ yermay, mudafaa ve bank saalarına qarşı sanktsiyalar kirsetti. Sanktsiyalar çalışqan müddeti iyül ayınıñ soñunda bite.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG