İyün 7-de İstanbul merkezinde yüz bergen patlav neticesinde 11 insan elâk oldı, 36 kişi yaralandı, dep bildire Türkiye ükümeti. İstanbul şeer yolbaşçısı Vasip Şahinniñ malümatına köre, elâk olğanlarnıñ arasında yedi politsiya hadimi oldı, dep bildire Azatlıq Radiosı.
Kütleviy haber vastalarınıñ malümatına binaen, bombalı avtomobil onıñ yanında politsiya hadimlerini taşığan avtobus keçken vaqıtta uzaqtan patlatıldı.
Bildirilgenine köre, patlav çoq adam olğan vaqıtta şeer merkezinde, İstanbul universiteti ve tarihiy kvartal yanında yüz berdi, o yerde çoq tarihiy obyektler yerleşe.
Patlav yüz bergen yerni köstergen fotoresimde zararlanğan avtobus ve binalarnı körmek mümkün.
Bundan da ğayrı, patlavdan soñ rayonda ateş açılması eşitilgeni bildirile. İç kimse bu vaqia boyunca mesüliyetni boynuna almadı.
Soñki vaqıtta Türkiyede ucumlarnı kürd silâlı taqımları, «İslâm devleti» taqımınıñ ekstremistleri ve «Kürdistan iş firqası» silâlı taqımları yapa.
