Rusiye Taqiqat komitetiniñ Qırım idaresi mayıs 25-ke keçer gecesi Bağçasarayda ğayıp olğan Ervin İbragimovnı qıdırmağa devam ete. Bu aqta iyün 6-da, bazarertesi künü müessiseniñ matbuat hızmeti bildirdi.
«2016 senesi mayıs 24-te belgisiz şahıslar Bağçasaray şeerinde «Ford Focus» markalı, E868CX region 01 devlet qayd etilüv işaretinen şahsiy avtomobilnen ketken İbragimovnı toqtattı, bundan soñ zorbalıqnen onı avtomobilge oturttı ve beli olmağan tarafqa alıp kettiler», dep hatırlattılar müessisede.
Bu vaqia boyunca Rusiye Cinaiy kodeksiniñ 126-ci maddesi 2-ci qısmındaki a maddesi (insannı hırsızlav) boyunca cinaiy iş taqiq etile, dep qayd ettiler Taqiqat komitetinde.
Taqiqat organları İbragimovnıñ hırsızlanuvı aqqında er angi malümatnı elde etken sakinlerge, bundan da ğayrı, videokameralar onıñ avtomobilini ya da onıñ hırsızlanmasını videoğa yazğan maşna aydavcılarına bu aqta haber etmege muracaat etti.
Mayıs 25-te, saba Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ İcra komitetiniñ azası Ervin İbragimov bu gece ğayıp olğanı aqqında belli oldı. Onıñ maşnası yol ortasında qaldırılğan tapıldı. Mayıs 24-te tahminen saat 23:00-te Ervin babasına telefon etip, ondan maşna vesiqaları aqqında soradı. Bundan soñ Ervinnen bağ bozuldı.
Ğayıp olğan Ervin İbragimov mayıs 25-te Meclis azalarınen Sudaqqa barmağa niyetlene edi, o yerde qırımtatar faalleri mahküm etilecegi planlaştırılğan.
Mayıs 27-de Bağçasarayda Rusiye İçki işler nazirliginiñ şeer idaresi binası yanında ğayıp olğan vatandaşnı tapmaq içün qıdıruv işlerini başlamasını talap etken onlarca qırımtatarlar toplaştı.
Mayıs 24-te Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.
Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
