«Umma» Ukraina musulmanları diniy idaresiniñ müftisi Said İsmagilov vatandaşlarnı muqaddes Ramazan ayı kelüvinen hayırladı. Bu aqta o Facebook saifesinde yazdı.
«Ramazan – bu oraza tutma, dua, Quran-i Kerim, qurban ve afu sorama ayıdır. Bu sabır ayıdır, sabır içün mükâfat ise, Cennettir», – dep aytıla hayırlavda.
Ramadan (Ramazan) ayı bütün musulmanlar içün eñ müim ve eñ şerefli bir aydır. 2016 senesi bu ay iyün 5-te küneş batmasınen başlandı ve iyül 4-te aqşam yekünlenecek.
Ramazan yekünlengen soñ musulmanlar Oraza bayramını qayd ete. Üç bayram kününden birinci kün olar bayram namazını qıla, eñ güzel urba kiye, milliy aşlar pişire, bayram sofralarını donata, qomşularnı, soy-sop ve dostlarnı musafirlikke davet ete, ediyelernen musafirlikke bara, quvana ve şeñleneler.
Rusiye tarafından işğal etilgen Qırımda keçken sene bayram Aqmescitteki Gagarin bağçasında politsiya nezareti astında keçirildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
