Kezlev soqaqlarınıñ birinde binalar divarlarında soñki rusiyeli padişa II-ci Nikolaynıñ resimlerini yaptılar.
Graffiti fotoresimlerini içtimaiy ağlar qullanıcıları paylaşa. Elde etilgen malümatqa binaen, resimler şeerniñ eski qısmı soqaqlarınıñ birinde peyda oldı.
Hususan, resimlerde 1916 senesi padişa qorantası Kezlevni ziyaret etkenini köstergen levhalarnı körmek mümkün. Belli ki, padişanıñ qorantasınen Kezlevge ziyareti qısqa ve iş boyunca oldı.
2016 senesi mayıs ayında Kezlevde padişa şeerni ziyaret etkeninden 100 yıl tolğanı munasebetinen II-ci Nikolay abidesi açıldı.
Qırım Rusiye tarafından işğal etilgen soñ yarımadada divarlarda rusiyeli prezident Vladimir Putinni köstergen graffitilerni faal şekilde yapmağa başladılar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
