Link açıqlığı

Aktobe şeerinde atış neticesinde 17 insan elâk oldı, dep bildireler Qazahistan İçki işler nazirliginde.

Olarnıñ arasında bazar künü yüz bergen silâlı ucumnıñ 11 tahmin etilgen iştirakçisi, 3 asker, silâ tükânınıñ satıcısı ve ziyaretçisi, qaravul agentliginiñ hadimi oldı. Qazahistan Sağlıq saqlav nazirliginiñ malümatına köre, daa 38 kişi yaralanğan.

Şeerde terroristik telükesiniñ eñ yüksek, «qırmızı» seviyesi ilân etildi. Sakinlerni «binalarda qalmağa ve şeer boyunca areketni sıñırlamağa» çağıralar.

İyün 5-te Aktobede onlarca insanlar eki silâ tükânını abradı, soñra yolcu avtobusını zapt etip, arbiy bölükke ucum etmege tırıştı. Havfsızlıq quvetleri ucumğa qarşılıq berdi, ucum etkenlerniñ bir qısmı (Qazahistan TİN malümatına köre, eñ azdan 27 kişi) belli olmağan tarafta ğayıp oldı. Yedi şeklenilgen insan yaqalandı.

Qazahistan Tışqı işler nazirliginiñ temsilcisi Almas Sadubayevniñ ilân etkenine köre, ucum etkenler, ğaliba, «ananeviy olmağan diniy firqalarnıñ radikal tarafdarları» ola.

Ucum sebepleri daa belli degil.

Aktobe şeeri Rusiye sıñırından 100 kilometr uzaqlığında yerleşe. 2011 senesi Aktobe Qazahistanda ilk öz-özüni öldürgen kişiniñ ucumı yüz bergen şeer oldı.

Kremlde qayd etkenlerine köre, Aktobede yüz bergen vaqialar Qazahistannıñ içki işi ola.

XS
SM
MD
LG