Kremlge boysunğan Qırım prokurorı Natalya Poklonskaya Aqmescit aylanma yolunda yol örtüsi omrağanı neticesinde altı insan, bu cumleden balalar, elâk olğan qaza boyunca cinaiy işniñ toqtatılması aqqında qararnı lâğu etti.
Bu aqta işğal etilgen Qırımnıñ rusiyeli prokuraturası matbuat hızmeti bildire.
«Qabul etilgen qararlarnıñ qanun ve deliller tarafından ögrenilüvi neticesinde, qararlar vaqtından evel, teşkerilmegen ve dava malümatlarına mütenasip olmağan neticelerge köre alınğanı belgilendi», – dep qayd ettiler müessisede.
Bundan evel, altı insan elâk olğan qaza boyunca qabaatlanğan «Yujdorstroy» şirketiniñ reberiyeti ve «Bağçasaray yol quruvu idaresi» şirketiniñ hadimlerine qarşı açılğan cinaiy iş toqtatılğanı aqqında malümat peyda olğan edi. Cinaiy iş Ğalebe kününe bağışlanıp çıqarılğan amnistiya boyunca toqtatıldı.
2015 senesi politsiya Aqmescit-Dubki yolunıñ omravı neticesinde 6 insan elâk olğanına bağlı sayılğan «Bağçasaray yol quruvı idaresi» şirketi bölüginiñ müdiri, baş müendisi ve ustasına qabaatlavnı taqdim etti.
2014 senesi sentâbr 28-de içinde 8 insan bulunğan avtomobil yolda 9 metrlik çuqurğa tüşti. Çuqur yolnıñ bu qısmında yol örtüsi omrağanı neticesinde peyda oldı. Yol qazası neticesinde eki bala yaralarnen hastahanege alıp ketirildi, qalğan altı insan, bu cümleden eki bala, elâk oldı.
Omrav, tübünde demiryol tünneli keçken yol qısmında yüz berdi. Yol quruvınıñ baş yapıcısı (podrâdçik) «Yujdorstroy» şirketi edi. «Krımavtodor» şirketi ise, yol baqımı içün mesüliyetli edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
