Link açıqlığı

Qırımda ana-babalarnı ukrain aliy oquv yurtlarına kirecek olğan balalarğa qol tutmağa çağıralar


Psihoterapevt işğal etilgen Qırımda yaşağan ana-babalarğa Ukraina qıtaiy territoriyasında aliy oquv yurtlarına kirmege istegen balalarğa destek köstermege tevsiye ete.

Bu aqta psihoterapevt, buhraniy vaziyet boyunca mesleatçı Natalya Ulko Qırm.Aqiqat Radiosınıñ saba yayınında bildirdi.

«Balalarıñızğa işanıñız, olarnen bağğa çıqmağa, yolda olarğa destek köstermege azır oluñız», – dep qayd etti psihoterapevt.

Ruhiyatçınıñ fikrince, abituriyentler oqumaq içün ukrain aliy oquv yurtlarını saylağanı, olar özlerini Ukraina vatandaşları sayğanını bildire.

Bu sene ukrain ükümeti Qırım sakinlerine aliy oquv yurtlarına kiriş sistemasını qolaylaştırdı. Yarımada abituriyentlerine ukrain mekteplerinde uzaqtan tasil almağa ve Tışqı mustaqil bilgige qıymet kesüvden keçmek içün elektron şekilde vesiqalarnı tapşırmağa teklif etile.

Bundan da ğayrı, şimdiki vaqıtta Ukraina Tasil nazirligi Qırım sakinleri içün devlet parasına oquma kvotalarını kirsetmege planlaştıra.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG