Kreml tarafından tayinlengen Qırım ükümetiniñ reisi Sergey Aksönov Aqmescit şeer memuriyeti yolbaşçısına modul bala bağçaları içün 25 topraq damartısını ayırmasını temin etmege avale etti.
Rusiyege boysunğan Aqmescit memuriyeti matbuat hızmetiniñ bildirgenine köre, şeer memuriyetiniñ yolbaşçısı Gennadiy Baharevniñ sözlerine binaen, Qırım ükümeti Rusiye prezidenti Vladimir Putinden bu maqsatlarğa kerekli paranıñ ayırmasına razılığını aldı.
Rusiye ükümeti 2016 senesi yanvar 1-ge qadar bala bağçalarına olğan nevbetlerni yoq etmege avale etti. Amma Moskvağa boysunğan Qırım Tasil nazirligi bu vazifeni belgilengen müddet devamında yerge ketirmek imkân olmağanını qayd etti. Bala bağçalarına nevbetlerni tek 5 yıldan soñ yoq etmege söz bereler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
