Qırımda qırımtatar muhtariyetiniñ teşkil etilmesi boyunca Esas qanunğa deñişmeler kirsetilmesinen bağlı meseleler boyunca Anayasa komissiyasına qırımtatar temsilcileri kirecek. Bu aqta Ukraina prezidenti Petro Poroşenko iyün 3-te Kiyevde keçirilgen matbuat konferentsiyasında bildirdi.
«Esas qanun içün azırlaycağım bütün deñişmeler kibi, aynı şekil olacaq. Bu, Esas qanun komissiyasına teslim etilmesi, oña qırımtatar temsilcileriniñ kirmesi, diqqatnen yapılğan çalışma, muzakereler, imzalanma ve Yuqarı Radağa teslim etilmesi olacaqtır», – dedi Ukraina prezidenti, ve «qırımtatarlarğa işanmaq kerek, olardan qorqmaq kerekmey», dep qoştı.
Ukraina prezidenti Petro Poroşenko, devlet Anayasasına qırımtatar milliy territorial muhtariyetiniñ teşkil etilmesi içün kerekli deñişmelerniñ tezce kirsetilmesine yardımcı olacağını vade etti.
2015 senesi Ukraina prezidenti Petro Poroşenko Ukraina Esas qanunına Qırımda qırımtatarlarnıñ milliy muhtariyeti aqqında maddelerni kirsetmege kerek olğanı aqqında ilân etti. O, aynı vaqıtta, halq deputatlarını devlet Anayasasına mütenasip deñişmelerniñ kirsetilmesine qol tutmağa çağırdı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
