İyün 2-de burçaq ile şiddetli yağanaqlar işğal etilgen Qırımda suv basuvınıñ sebebi oldı. Bu aqta Rusiyege boysunğan Fevqulade vaziyetler nazirliginiñ Qırım idaresi bildire.
Müessiseniñ malümatına köre, keçken kün devamında qoruyıcılar furtuna sebebinden sekiz kere ealige yardım etmek içün çıqtı.
Kefede yolğa ve evlerge tüşken tereklerni cıyıştırmaq kerek oldı.
Kefe yanındaki Otuz (Şebetovka) ve Köktebel köylerinde şahsiy evler yerleşken rayonnı suv bastı, bu yerde de terekler sınıp tüşti.
Yarımadanıñ Aqmeçit (Çernomorskoye) rayonında sağanaqlar zarar ketirdi, dep bildireler Fevqulade vaziyetler nazirliginde. Aqmescitte çoq soqaq suv astında qaldı. Zararlanğanlar aqqında malümat yoq.
Bundan evel müessisede iyün 2 ve 3 künleri Qırımda furtuna havfı ilân etilgenini haber ettiler. Vatandaşlarğa sağanaqlar neticesinde özenlerde suv seviyesi köterilecegi aqqında bildirdiler.
Keçken sene tahminen aynı vaqıt yarımadada şiddetli sağanaqlar yağdı. Tarlalar ve bağçalarnı suv bastı, Aqmescitte çoq soqaqlarnıñ asfaltı, sağanaq kanalizatsiyası bozuldı. Onı tüzetmek içün 22 milliard ruble kerek oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
