Meteorologlar Frenkistan ve Almaniyada şiddetli yağmurlar yağmağa devam etecegi aqqında bildire, o yerde suv basuvı neticesinde endi 10 kişi elâk oldı ve biñlerce insanlar tahliye etilmege mecbur oldı, dep bildire Azatlıq Radiosı.
Elde etilgen malümatqa köre, Paristeki Sena özeninde suv seviyesi artmağa devam ete. Yüz bergen vaqia sebebinden Luvr hadimleri yerastı anbarlardan bazı eksponatlarnı diger yerge taşımağa mecbur oldı. Frenkistan paytahtında ve onıñ civarında 24 biñden ziyade ev yarıqsız qaldı. Prezident Fransua Olland eñ çoq zararlanğan rayonlarda fevqulade vaziyetni ilân etti.
Almaniyada suv basuvı devletniñ cenübiy tarafını, Bavariya ve Reynland-Pfaltseni qaplap aldı. O yerde de elâk olğanlar bar, kantsler Angela Merkel olarnıñ qorantalarına taziye bildirdi.
Angela Merkelniñ qayd etkenine köre, felâketke reaktsiya almanlarnıñ ağır vaziyette birleşken olğanını kösterdi.
