Link açıqlığı

Rusiyege boysunğan Aqmescitteki Kiyev rayon mahkemesi aselet maşnalarnı yaqqanında qabaatlanğan 20 ve 18 yaşındaki eki Aqmescit sakinine qarşı açılğan cinaiy iş boyunca qarar aldı. Bu aqta işğal etilgen Qırım rusiyeli prokuraturası matbuat hızmeti bildire.

«Qabaatlanğanlar keçken sene oktâbr – noyabr ayları devamında onğa yaqın maşnanı yaqqanı, bunen beraber, olarnıñ sözlerine köre, yaramazlıqtan başqa maqsatları yoq olğanı belgilendi», – dep aytıla beyanatta.

Müessiseniñ malümatına köre, 4,8 million ruble zarar ketirildi, bu zarar taqiqat ceryanında bütünley ödelendi.

Mahkeme qararına binaen, Qırım sakinleriniñ 4 ve 1 yılğa apiske qapatılması belgilendi. Olar koloniyada bulunacaq.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG