Qırım müftisi hacı Emirali Ablayev Qırım territoriyasında Qırım ve Sevastopol musulmanları diniy idaresine (QMDİ) muvaziy olğan strukturalarnıñ çalışması mümkün olmaması aqqında ilân etti. Bu aqta o, iyün 2-de Aqmescitte keçirilgen Hac-missiya toplaşuvında ayttı, dep bildire QMDİ matbuat hızmeti.
Emirali Ablayevniñ qayd etkenine köre, muvaziy teşkilâtlarnıñ faaliyeti «Qırım musulmanları arasında bölünüv ve zıddiyetke ketire, bu ise cumhuriyette umumiy vaziyetke tesir ete».
«Şimaliy Kavkaz musulmanları İdareci merkeziniñ reisi İsmail Berdiyevniñ qayd etkenine köre, Qırım territoriyasında iç başqa mütfiyatlarnıñ olmaması kerek», – dep bildirdi QMDİ matbuat hızmeti.
Bundan evel elde etilgen malümatqa köre, Qırım ve Sevastopol musulmanları diniy idaresi (QMDİ) yarımadada derc etilgen bütün islâm neşirleri QMDİ tarafından uyğunlaştırılmaq kerek, dep teşebbüsini bildirdi. Bundan da ğayrı, iyün 2-de Qırım ve Sevastopol musulmanları diniy idaresi (QMDİ) yarımadada «hac seferini teşkil etmek içün onıñ yekâne aqqı» olğanını ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
