Aqmescitte eñ yahşı sayılğan «Artek», «Orlönok» ve «Smena» lagerlerinde raatlana bilecek istidatlı balalarnıñ malümat bazasını tizmege başladılar. Bu aqta Moskvağa boysunğan Aqmescit memuriyeti matbuat hızmeti bildire.
«Komissiya «Artek», «Orlönok» ve «Smena» lagerlerinde tedaviylenme içün putövkalarnen taqdirlenecek istidatlı balalar ve ösmürler, oquv alâcıları, bala cemaat teşkilâtlarınıñ liderleri, icadiy kollektivler ve sport taqımlarınıñ azaları olğan balalarnı saylap ala», – dep aytıla beyanatta.
Müessisede qayd etilgenine köre, istidatlı balalar ve ösmürlerge bu tedaviylev müessiselerine yollama bedava berilecek.
2016 senesi aprel ayında Kiyev Obolon mahkemesi Rusiye tarafından işğal etilgen Qırımda yerleşken «Artek» lageriniñ mülkiyetini yaqaladı.
2015 senesi sentâbr ayında Qırım Muhtar Cumhuriyeti prokuraturası rusiyeli Qırım yolbaşçısı Sergey Aksönovğa «Artek» Halqara bala merkezi» adlı Ukraina devlet müessisesiniñ mülkiyetini qanunsız şekilde öz mülkiyetine alğanı sebebinden cinayet yapqanında şeklenilgenini bildirdi.
Moskvağa boysunğan Qırım ükümeti 2015 senesi mart ayında yarımadanıñ eñ büyük «Artek» bala lageriniñ mülkiyetini Rusiye federal mülkiyetine teslim etti.
«Orlönok» bala merkezi Anapada, «Smena» bala merkezi ise, Rusiye Krasnodar vilâyetindeki Novo-Mihaylovskiy köyünde yerleşe.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
