Kremlge boysunğan işğal etilgen Qırım parlamentiniñ yolbaşçısı Vladimir Konstantinov Qıtay Halq Cumhuriyetiniñ Haynan vilâyetiniñ Halq temsilcileri meclisinen işbirlik boyunca añlaşma tizilecegi aqqında ilân ete. Bu aqta yarımada parlamentiniñ matbuat hızmeti bildire.
«Qırım eyetiniñ Qıtayğa resmiy ziyareti neticesinde Qırım cumhuriyeti parlamenti Qırım Cumhuriyetiniñ Devlet şurası ve Qıtay Halq Cumhuriyetiniñ Haynan vilâyetiniñ halq temsilcileri arasında işbirlik añlaşmasınıñ tizilmesi planlaştırıla», – dep aytıla beyanatta.
Konstantinov Devlet qurucılığı ve yerli öz-özüni idare etüv meseleleri boyunca komitetke olucı añlaşma leyhası boyunca teklifler bildirmege avale etti.
Mayıs ortasında Vladimir Konstantinovnıñ yolbaşçılığında Qırım eyeti Pekinge bardı, o yerde, yarımada parlamenti matbuat hızmetiniñ bildirgenine köre, çin iş adamlarınen körüşüvler keçirildi.
2014 senesi Qırım Rusiye tarafından işğal etilgen soñ yarımada ükümeti Qırımda Qıtaynıñ bütün yatırım leyhaları toqtatılğanını ilân etti.
Bundan soñ şimdiki yarımada ükümeti çin iş adamlarınıñ Qırımğa olğan merağı aqqında bildirgenlerini ilân ete edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
