Rusiye müftiler şurasınıñ reisi Ravil Gaynutdin Kremlge boysunğan Qırım yolbaşçısı Sergey Aksönovğa «Maneviy birlik içün» medal taqdim etti, dep bildire «TASS» agentligi.
Medal Aksönovğa Aqmescitte keçirilgen «Rusiye musulmanlarınıñ hac seferiniñ teşkil etilmesi: keçken ve kelecek zaman. İslâm terrorizmge qarşı» konferentsiyasında taqdim etildi.
«Er angi dinler ve milletlerge mensüp olğan adamlar arasındaki barışıq, dostluq ve ürmetni saqlarmız», – dedi Aksönov medal taqdim etilgen soñ.
Kiyev patriarhatı Ukrain ortodoks kilsesiniñ temsilcileri Rusiye Qırımnı işğal etken soñ yarımadada basqıncılıq aqqında bildirmege başladı. Bazılar Qırımnı terk etmege mecbur oldı.
Bundan da ğayrı, işğalden soñ yarımadada camilerde tintüvler keçirmege başladılar.
Rusiyege boysunğan Qırım ükümeti yarımadada diniy mensüplikke köre basqıncılıq yoq olğanını bildire.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
