Link açıqlığı

İyün 1-den başlap Aqmescitte cemaat naqliyede bir taraf yol ücreti 12-den 13 rublege qadar yükselecek. Bu aqta Rusiyege boysunğan Aqmescit memuriyetiniñ matbuat hızmeti bildire.

«20.05.2016 qabul etilgen Qırım Cumhuriyetiniñ Fiyatlar ve tarifler boyunca Devlet komitetiniñ 20/3 sanlı emrine binaen, 2016 senesi iyün 1-den başlap, Qırım Cumhuriyetiniñ munitsipal territoriyalarında şeer naqliyede yolcu ve yük taşımasınıñ yañı ücreti belgilendi», – dep bildireler müessisede.

Aynı böyle naqliye ücreti Aluşta, Yalta, Canköy, Keriç ve Kefede de yükselecektir. Bağçasarayda yaz başında cemaat naqliyesinde yol ücreti 12 ruble, Ermeni Bazar, Krasnoperekopsk, Sudaq ve Saqta 11 ruble, diger meskün yerlerde 10 rubleni teşkil etecektir.

Umumen olaraq, Qırım Fiyatlar ve tarifler boyunca Devlet komitetiniñ malümatına köre, yazdan başlap cemaat naqliyede yol ücreti 8 fayızğa artacaqtır.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG