Link açıqlığı

Saatnıñ esas haberi

Qırımda Ukrain radiosınıñ dalğasını bastırıp olamazlar – ekspertler


İllüstratsiya fotoresimi
İllüstratsiya fotoresimi

Rusiyeli Qırım ükümeti yarımadada ukrain radio yayınlamasını bastırıp olamaz, dep bildirdi Qırım.Aqiqat Radiosınıñ yayınında Televizion ve radio yayınlaması boyunca Ukraina Milliy şurasınıñ azası Sergey Kostinskiy. Böyle etip o, Kremlge boysunğan Qırım prokurorı Natalya Poklonskayanıñ, kerek olsa, yarımadada ukrain radiosınıñ yayınlamasını blok etecekleri aqqındaki ilânına izaat berdi.

Kostinskiyniñ sözlerine köre, Televizion ve radio yayınlaması boyunca Milliy şurasında vaqtınca işğal etilgen Qırım territoriyasına yayınlaycaq bir qaç merkezniñ açılmasını planlaştıralar. Bu ise dalğanı bastırmaq içün mania olacaqtır.

«Ukrain radiosı yayınlağan dalğasınıñ – 549 kilogerts – bastırılması imkânsızdır. Bellesem, bu saada işimizni inkişaf etecekmiz. Qırımğa yayınlağan bu kibi dalğalar çoq olmaq kerek. FM dalğasını qolay bastıra bileler. Bizim vazifemiz şu ki, Qırım şimaline yayınlaycaq çoq radiostantsiyalar olmaq kerek, böyle alda, olarnıñ bastırılması qolay olmaz», – dep ayttı o.

Programmanıñ diger musafiri, Ukraina mudafaa naziriniñ mesleatçısı Aleksey Makuhinniñ qayd etkenine köre, ukrain dalğalarını bastırması rusiyeli Qırım ükümeti içün iqtisadiy taraftan masraflarnı ketirecek, orta dalğararnı bastırmasını alsaq ise, meselâ, Qırım.Aqiqat Radiosı yayınlağan dalğalar, bu daa da effektivsiz olacaqtır.

«Bu orta dalğalar olsa, o vaqıt olarğa (rusiyeli Qırım ükümetine – QA) bunı yapmağa (dalğanı bastırmağa – QA) pek ağır olacaqtır. Ve orta dalğalarnı sıñırdan degil de, Hersondan bütün Qırım territoriyasına yayınlamaq mümkün. Daa bir imkân bar – yoldaşqa (sputnikke) qoşulmaq, ve yoldaştan dalğa almaq. O vaqıt bir şey yapıp olamazlar», – qayd etti Aleksey Makuhin.

Rusiyege boysunğan Qırım prokurorı Natalya Poklonskaya onıñ müessisesi ukrain radiostantsiyasınıñ yarımada territoriyasına yayınlamasını «ekstremizm» tarafından teşkerecegini ve böyle bir şey tapılacaq alda onı blok etecegini ilân etti.

Mayıs 26-da Herson devlet vilâyet memuriyetinde bildirilgenine köre, Ukrainanıñ qıtaiy territoriyasından Rusiye tarafından işğal etilgen Qırım territoriyasına ukrain radio dalğası yayınlanmağa başladı. Şimdiki vaqıtta test rejiminde. Memuriyetniñ malümatına köre, Qırımda ukrain radiosı 101.4 FM dalğasında yayınlana.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG