Rusiyege boysunğan İçki işler nazirliginiñ Qırım baş idaresinde sanatoriyler biriniñ hadimleri şifahane yanında yerleşken savuttan soba yaqarlığını (mazut) tökkenlerini belgilendi. Müessise matbuat hızmetiniñ malümatına binaen, teşkilâtqa 180 biñden ziyade ruble miqdarında maddiy zarar ketirildi.
Bunen beraber, aselet başqasınıñ malına zarar ketirüv ya da yoq etüv aqqında madde boyunca cinaiy iş açılğanı aqqında bildirile.
«Yüz bergen vaqianıñ şaraitini ve qanunsız areketler yapqan şahıslarnı belgilemek içün operativ-taqiqat işleri alıp barıla», – dep aytıla beyanatta.
Mayıs ayında Aqyar deñiz yalısında yermay maddeleriniñ tökülmesi qayd etildi.
Qırımda Rosprirodnadzor (Rusiye tabiat nezareti) temsilcileriniñ malümatına köre, yermay maddeleri gemilerniñ birinden töküldi.
Ukraina Tışqı işler nazirligi Rusiye Federatsiyasına bu vaqia boyunca şikâyet etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
