Link açıqlığı

Bundestag Osmanlı Devletinde ermenilerni kütleviy şekilde öldürüvniñ genotsid olaraq tanıması boyunca rey bermege azırlana


İllüstratsiya fotoresimi

İyün 2-de Almaniya parlamenti Birinci cian cenki vaqtında Osmanlı Devletinde ermenilerni kütleviy şekilde öldürüvlerniñ genotsid olaraq tanıması boyunca rezolütsiyanı baqacaq, dep bildire Azatlıq Radiosınıñ mühbiri.

Türkiye, bu öldürüvler genotsid olğanını red ete. Türkiye prezidenti Recep Tayip Erdoğan almaniyalı parlamentine evelden haber etti ki, bu rezolütsiya qabul etilgen alda eki devlet arasındaki munasebetlerge zarar ketirecek.

Ermenistan prezidenti Serj Sargsân rey berüv arfesinde almaniyalı qanun çıqarıcılarnı Erdoğannıñ bu ihtarını köz ögüne almamağa çağırdı.

«Eger tek diger devletniñ prezidentini açuvlandırğanı sebebinden ermenilerniñ genotsidine genotsid dep aytıp olamasañız, bu namussızdır», – dep ilân etti Sargsân iyün 1-de Bild alman gazetasına bergen izaatında.

Dünyanıñ 20 devletinden ziyade Osmanlı Devleti tarafından ermenilerniñ öldürilüvi ve sürgün etilüvini genotsid olaraq tanıdı. 1915-1917 seneleri türk-osmanlılar tarafından tahminen 1,5 million ermeniniñ öldürilmesi çoq tarihçı tarafından ХХ asırnıñ ilk genotsidi olaraq baqıla.

Türkiyeniñ qayd etkenine köre, ermeniler Osmanlı Devleti ükümetiniñ aselet yapqan areketleri neticesinde degil de, vatandaş nizamsızlığı sebebinden elâk olğan.

XS
SM
MD
LG