Rusiyege boysunğan Keriç memuriyeti Rusiye Federatsiyası İqtisat nazirliginen sürgün etilgen vatandaşlar içün 72 daireli ev qurması boyunca vesiqalarnıñ keliştirilmesi aqqında bildire.
«Qırım cumhuriyeti Milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ malümatına binaen, şimdiki vaqıtta topraq damartısınıñ şeer quruvı planı işlep çıqarıldı ve alğışlandı. Bütün kerekli vesiqalar ekspertizadan keçti ve Rusiye Federatsiyası iqtisat naziri tarafından imzalandı», – dep aytıla Qırım müessisesiniñ beyanatında.
Keriçte sürgün etilgenler içün çoq daireli ev quruvı «2020 senesine qadar Qırım cumhuriyeti ve Aqyar şeeriniñ içtimaiy-iqtisadiy inkişafı» Federal programmasında planlaştırılğan.
Evniñ Marat – 5 rayonında (Blüher soqağı) qurulması beklenile. Evniñ işke tüşürilmesi 2018 senesine planlaştırıla.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
