Ukraina Nazirler kabineti iyün 1-de keçirilgen toplaşuvda Ukrainada «Eurovision-2017» halqara yır yarışmasınıñ keçirilmesi içün teşkiliy komitetni tizdi.
Şimdiki vaqıtta teşkiliy komitet azalarınıñ terkibi belgilene, dep bildirdi medeniyet naziri Yevgeniy Nişuk.
Ukraina paytahtınıñ şeer yolbaşçısı Vitaliy Kliçko mayıs 26-da keçirilgen Kiyev şurasınıñ toplaşuvında Kiyev 2017 senesi «Eurovision» yarışını keçirmek içün azırlıq körmege başlağanını bildirdi.
Ukraina temsilcisi, Qırım yırcısı Jamala «Eurovision-2016» yarışında ğalebe qazandı, onıñ finalı İsveçiya paytahtı Stokgolm şeerinde mayıs 15-ke keçer gecesi keçirildi. Konkurs qaidelerine binaen, endi kelecek sene Ukraina «Eurovision» yarışını öz devletinde qabul ete bile, amma onıñ bunı red etmege de aqqı bar.
Ukraina «Eurovision» yır yarışında 2003 senesinden başlap iştirak ete. 2004 senesi Ukraina temsilcisi Ruslana «Wild Dances» yırınen ğalebe qazandı.
Ukraina konkursnıñ rekordçı devletlerinden biri ola, çünki yahşı neticelerni köstere. 2015 senesi devlet Ukrainanıñ Birinci milliy kanalınıñ arizasınen ilk sefer yarışta iştirak etmekten vazgeçti, bunıñ sebebi devlette kerginleşken maliye ve siyaset vaziyeti oldı.
