Link açıqlığı

İyün 5-ke qadar Rusiye tarafından işğal etilgen Qırımda «Sankt-Peterburg künleri» keçirilecek. Moskvağa boysunğan yarımada ükümetiniñ matbuat hızmetiniñ bildirgenine köre, «Sankt-Peterburg ve Qırım cumhuriyeti meşğuliyet hızmetleriniñ mütehassıslarınen mesleat körüşüvleri, tögerek masalar, seminarlar, konferentsiyalar ve bir sıra diger merasimler» teşkil etilecektir.

Bildirilgen malümatqa köre, rusiyeli musafirler yarımadada «Tasil faaliyetiniñ reglamentatsiyası: yolbaşçı tecribesi» mevzulı master-klass, mektepten aldın tasilniñ tatbiq etilmesi meseleleri boyunca tögerek masa keçirecekler.

«Sankt-Peterburg künleri» çerçivesinde energetik havfsızlığı mevzusına bağışlanğan tögerek masalarnıñ teşkil etilmesi planlaştırıla.

Bu kibi merasimler yarımadada endi ekinci sefer Sankt-Peterburg akimiyeti ile tizilgen 2015 – 2018 seneleri ticariy-iqtisadiy, ilmiy-tehnikiy, içtimaiy ve medeniy işbirligi aqqında añlaşmanıñ ömürge keçirilmesi çerçivesinde teşkil etile.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG