Link açıqlığı

Ukraina Nazirler kabinetinden qırımtatar tiliniñ latin urufatına keçüvini tasdıqlamasını talap eteler


Teşebbüs gruppası Ukraina Nazirler kabineti içün latin urufatında qırımtatar elifbesiniñ tasdıqlanması boyunca qanun leyhasını işlep çıqardı. Qarar Ukraina ükümetine teslim etilmesi içün azırlanıla. Bu aqta iyün 1-de Kiyevde keçirilgen matbuat konferentsiyasında Ukraina tasil ve ilim naziriniñ mesleatçısı Elhan Nuriyev ilân etti, dep bildire Qırım.Aqiqat mühbiri.

«Şimdiki vaqıtta Tasil ve ilim nazirliginden Adliye nazirligine mektüp teslim etildi, olar ise Ukraina Milliy ilim akademiyasınıñ akademik institutlarına muracaat etmeli. Bütün bu protseduralardan keçemiz, Nazirler kabineti içün leyhamıznı azırlaymız, onı Vladimir Groysman imzalamalı», – dep añlattı Nuriyev.

Teşebbüs gruppasınıñ azaları leyhanı ileriletmek içün cemaatçılıqqa ve Ukraina Haber siyaseti nazirligine de muracaat etti.

«İşbu elifbeniñ malümat cenkinde, içtimaiy cenkte ne içün müim olğanını añlamağan adamlarğa, bu cümleden ükümette olğanlarğa bu malümatnı bildirmek kerekmiz», – dep ayttı O.P.A.D. Tışqı siyaset tedqiqatı merkeziniñ müdiri Sergey Parhomenko.

«Rusiyeniñ assimilâtsiya elementleri olğan ve Rusiyege öz areketlerini devam etmege yardım etecek element olğan bir çoq rıçağı bar... Bu ise, adamlarğa Rusiye tarafından işğal etilgen territoriyalarda ayaqqa turmağa ve Qırımnıñ Ukrainağa qaytaracaq küreşni başlamağa yardım etecek bir adımdır», – qayd etti o.

Ekspertler qırımtatar tili fonetikası kirill urufatına ait olmağanını ve bu til UNESCO tarafından ğayıp olğan ve qorçalavnı talap etken bir til olğanını hatırlattı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG