Link açıqlığı

Rusiye Taqiqat komitetiniñ Qırım idaresiniñ İslâm-Terek rayonlarara taqiqat bölügi 30 yaşındaki yerli sakinge, öz menfaatını tüşünip, yaş qadınnı öldürgeni içün qabaatlavnı taqdim etti.

Bu aqta Taqiqat komitetiniñ Qırım idaresiniñ matbuat hızmeti bildire.

«Taqiqatnıñ malümatına binaen, 2016 senesi mayıs 29-da aqşam qabaatlanğan kişi, avtobus turağında tanış qadınnı körip, onı evge alıp ketmege teklif etti.Qadın onıñ avtomobiline mingen soñ, aqay kişi yol marşrutını deñiştirdi, onı ormanğa alıp ketti, ve qurbannıñ altın ilvanlarını almaq içün onı öldürdi», – dep aytıla beyanatta.

Müessiseniñ bildirgenine köre, taqiqat çerçivesinde 10 insan sorğuğa çekildi, vaqia yüz bergen yeri ve qabaatlı kişiniñ avtomobili baqıldı, bir sıra mahkeme ekspertizalarnıñ keçirilmesi belgilendi. Cinayetniñ bütün şaraiti ögrenile. Cinaiy iş taqiqatı devam ete.

36 yaşındaki Mumine Aliyevanıñ cesedi zorbalıq izlerinen mayıs 29-da ormanda tapıldı. Qırım Taqiqat komiteti bu vaqia boyunca cinaiy iş açtı.

Rusiyege boysunğan İçki işler nazirliginiñ Qırım baş komitetiniñ matbuat hızmetinde bildirilgenine köre, mayıs 30-da cinayet yapqanında şeklenilgen kişi yaqalandı. Bu, 30 yaşındaki İslâm-Terek rayonınıñ sakini oldı, o qabaatnı boynuna alğanı aqqında ariza yazdı ve yaş qadınnı öz avtomobiline mayıs 29-da aqşam cemaat naqliye turağında alğanını añlattı. Qadınnıñ cenazesine Tamğacı köyüne yüzlerce vatandaşlar keldi.

Meclis reisi Refat Çubarovnıñ sözlerine köre, yüz bergen vaqia «Qırımda qırımtatarlarğa qarşı yapılğan nevbetteki cinayettir».

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG