Link açıqlığı

Rusiyege 2016 senesiniñ soñuna qadar sanktsiya siyasetiniñ yımşacağını beklemek kerekmey, dep ilân etti Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarov Berlinde keçirilgen körüşüvler neticesinde. Çubarov o yerde «Almaniyanıñ OSCE-2016-da yolbaşçılığı: Donbass ve Qırımda uquq qoruyıcı işi içün yañı impulslar» podium munaqaşalarında iştirak ete.

«Tünevin Berlinde keçirilgen körüşüvlerniñ neticelerini qısqadan aytsaq, Rusiyege 2016 senesiniñ soñuna qadar oña qarşı olğan sanktsiyalarnıñ yımşacağını beklemek kerekmey: onıñ halqara uquqnı bozğanını afu etmege kimseniñ niyeti yoq...», – dep yazdı Çubarov Facebook saifesinde.

Bundan evel Qırım.Aqiqat Çubarov Almaniyağa ziyaret çerçivesinde işğal etilgen Qırımda insan aqları vaziyetini muzakere etecegini planlaştırğanı aqqında bildire edi. Hususan, Almaniya kantsleri Angela Merkelniñ ofisinde körüşüvlerniñ keçirilmesi qayd etilgen.

2016 senesi fevral ayında Avropa parlamenti rezolütsiya qabul etti, bu rezolütsiyada Rusiye tarafından işğal etilgen Qırımda yarımada sakinleriniñ, hususan qırımtatarlarnıñ aqları bozulmasınıñ «yüksek seviyesini» takbih etti.

Qırım işğal etilgen soñ yarımadada aman-aman er kün tintüvler keçirile, insanlar yaqalana, çeşit türlü yasaqlar etile. Qırımnıñ rusiyeli ükümeti yarımadada insan aqları bozulğanı aqqındaki malümatnı red ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG